سؤال صريح جدا .. ياترى احنا لسه بنحب مصر ؟؟
كتبهاشباب غاوي حرية ، في 10 يوليو 2007 الساعة: 11:35 ص
سؤال صريح جدا .. ياترى احنا لسه بنحب مصر ؟؟
السلام علييكم يا شباب .. جايين انهارده ومعانا موضوع فى غاية الخطورة لكل شاب مصري وفتاه مصرية وبنسألهم لسه بتحبوا مصر تعالوا معانا نقرا الموضوع وياريت نناقشه مع بعض ..
يا ترى إحنا لسة بنحب مصر ؟؟؟؟؟
يا ترى إحنا لسة بنحب مصر ؟؟؟؟؟
قبل ما تندفع وتقول طبعا دى مصر هى امى ونيلها هو دمى وتكلمنى عن شهامة ولاد البلد واخلاق بنت البلد وبنات وسط البلد …… خلينا نتكلم بواقعية شوية .يا ترى يا جماعة مصر بتمثل لكل شاب فينا ايه ….. ياترى ذكرياتك الحلوة فيها اكتر ولا الوحشة ؟؟؟؟مصر بلدنا اللى اتحولت الحياة فيها لمعاناة مستمرة من اول ما تفتح عينيك الصبح لحد ما تغمضها باليل …… تنزل الصبح من البيت ويبدأ الصراع …. صراع مع سواق الميكروباص وصراع مع ركاب الميكروباص ….. صراع مع زميلك فى الشغل وصراع مع ظابط المرور ومع سواق التاكسى ومع موظفين الحكومة ومع الناس اللى فى الشارع وصراع مع أصحابك فى الجامعة او المدرسة وصراع مع المدرسين ……. سيبك طبعا من صراع غض البصر اللى غالبا بتخسر فيه لأنك ممكن تخبط فى عامود نور وانت ماشى عشان مبقاش ينفع تبص غير فى الأرض …… مصر اللى مبقاش فيها حاجة صح لا تعليم ولا صحة ولا إسكان ولا اخلاق …. مصر اللى الشرطة فيها بتقهرنا واصحاب رأس المال بيستعبدونا …. مصر اللى شعبها من كتر الهم والجوع اتخلقت عنده عقد نقص وكراهية ضد الأخرين ….. مصر اللى كتر فيها الإجرام وبدل شهامة ولاد البلد … بقى تحرش الولاد بالبنات فى وسط البلد ….. مصر اللى تخاف على بنتك ومراتك واختك يمشوا لوحدهم فى الشارع خايف عليهم من 1000 خطر … تحرش وسرقة وإغتصاب وسفاح المعادى ورخامة امناء الشرطة وغلاسة ولاد البلد .شايفين بلادنا بقيت عاملة إزاى يا جماعة ؟؟؟ ……. يا جماعة محدش يفهم انى عايز اقول انى بكره بلادى او بحرض على كراهيتها ….. ابدا والله انا بفضفض عشان انا نفس مبقيتش فاهم …….. شايفين كل البلاوى اللى فى مصر دى ؟؟؟؟؟ بس برغم كدة حد فينا حاسس انه بيكره مصر ؟؟؟؟؟ بردو لأ ………… طيب مصر دى ايه حكايتها .انا حاسس الإحساس ده وعارف انكو كلكوا حاسين نفس الإحساس …….. كل ما احاول اكرهها ميهونش عليا اقولها ….. كل ما افكر انى اهاجر قلبى مايطاوعنيش انى اتخيل حتى …. كل ما اتخنانق مع سواق ميكروباص أو مدرس فى مدرستى او دكتور فى جامعتى ….. اقابل راجل أو شاب طيب مبتسم قاعد جمبى فلا املك إلا الإبتسام ……. كل ما اتقزز من افعال الشرطة ومن التعامل معاهم ……. اقع فى ظابط ابن ناس اوى ومحترم والاقيه بيعامل الناس كويس …… كل ما افتكر مشاكل سواقين التاكسى اركب مع سواق تانى راجل بركة يدعيلى ويطبطب عليا …….. كل ما اتخنق من البنات الكاسيات العاريات اقابل اخت محترمة كويسة اوى …. اقول الحمد لله الدنيا بردو بخير ………… كل اما اشوف العراق واللى بيحصل فيها واتخيل ان ده ممكن يحصل لمصر احس بألف شوكة فى قلبى واحس ان الدم بيغلى فى عروقى وعايز اقف على حدودها واموت الف مرة دفاعا عن بلادى .يا جماعة انا بجد مش فاهم ….. يا ترى جيلنا ده بيحب مصر ولا لأ ؟ وحد يرد عليا يفهمنى هو انا لوحدى اللى متعذب فى حب وكراهية البلد دى ولا ده إحساس جيلنا كله ؟؟؟ تعالو نواجه نفسنا ونجاوب عالسؤال ده
ياترى احنا لسة بنحب مصر ؟؟؟؟
ـــــــــــــــــــــــــــــــــــــــــــــــــــــــــ
التصنيفات : السياسية هم وفن, كلام من جوه القلب | السمات:كلام من جوه القلب, السياسية هم وفن
أرسل الإدراج | دوّن الإدراج
يوليو 10th, 2007 at 10 يوليو 2007 3:04 م
بدايه انا بحييكم على الجروب الجميل ده .. ويارب تحققو احلامكم واهدافكم من المدونه ..
وانا ان شاء الله متفائله خير من الجروب بتاعكو
فى رعايه الله
يوليو 10th, 2007 at 10 يوليو 2007 3:26 م
يا زعيم العيب مش في مصر احنا اكبر عيب لمصر
واكبر عيب ( النفاق ) ايوا نبقى شايفين صاحبنا بيدى مصر بالشلوت
ونصقف ونقولوا برافواااااااااااااااااااااااا
ومش هنكدب عليه عشان الكداب بيروح النار
لكن هنقولوا شلوت سعادتك دفعة للاماممممممممممممممممممممممم
يوليو 10th, 2007 at 10 يوليو 2007 3:29 م
نسيت ادعوك لمدونتى اللى لسه جديدة
وللمفارقة اسمها اجابة على سؤالك ( بحبك يا مصر )
يوليو 11th, 2007 at 11 يوليو 2007 6:03 ص
الأخوة الأعزاء
تعالوا ندون غدا من اجل العالقين على معبر رفح.
تعالوا نبدأ غدا حملة التضامن مع أخوة لنا في العروبة وفي الدين.
تعالوا نقول للجميع: خلوا عندكم دم، خلوا عندك وطنية، خلوا عندكم إنسانية.
تعالوا نصرخ في وجه الجميع كفى هزلا في مواضع الجد..
تعالوا نقول لهم جميعا: حرام عليكم يا ظلمة..
تعالوا نقول لهم جميعا: افتحوا المعبر الآن وليس غدا.
يوليو 11th, 2007 at 11 يوليو 2007 9:43 ص
إثنـانِ في أوطانِنـا
يرتَعِـدانِ خيفَـةً
من يقظَـةِ النّائـمْ:
اللّصُّ .. والحاكِـمْ
ادعوكم لزيارة مدونتى بحبك يا مصر
http://ba7ibekyamasr.maktoobblog.com
يوليو 11th, 2007 at 11 يوليو 2007 12:44 م
اشكر كل من قام بالر دعلي واريد منكم ان تزودوني بخبراتكم
بتعليقكم وزيارتكم الدائمة لمدونتي المتواضعة
أكتوبر 22nd, 2007 at 22 أكتوبر 2007 6:59 م
إنها مصر ..إنها مصر.
.أم الدنيا ..وأسطورة التاريخ القديم والحديث .
.والمستقبل بأذن الله..
……………………
كل بلد بها صراعات وامور صعبة ولكن احنا نستطيع ان نغير الكثير ..
اذا بدأ كل واحد بنفسة اكيد الكثير سوف يتغير
وتحياتي